 | |
| | |
 |
شاندا تایێ هەرمان ل ئەلمانیا و ئەوروپا ب سەروكاتیا پرۆفسۆر هەڤال میرو ب ئاوایەكێ فەرمی دگەل خاتوو (ئەنجلیكا گراف) سەروكا پشكا مافێت مروڤان و هەڤكاریێت مروڤی د پەرلەمانێ ئەلمانیادا كوم بوی .
روژا (8/6/2010) دەمژمێر 9ێ سپێدێ ب دەمێ ئەلمانیا خاتوو ( ئەنجلیكا گراف ) و خاتوو ( ویبەر ئێنیتۆ ) ل بالەخانا پەرلەمانێ ئەلمانیا پێشوازی ل شاندا هەرمان كر . پشتی كو تایێ هەرمان پرسا جینوسایدا ل دژی گەلێ كوردستانێ دسالێت 1983-1988 ب ئاوایەكێ بەرفرەدا خویاكرن، د هەمان دەمدا بالكشاندە سەر كونفرانسا یەكەم یا كو ل سالا (2008) ل ژێر چاڤدێریا رێزدار ( نیچێرڤان بارزانی ) سەروكیَ حكومەتا هەرێما كوردستانێ كابینا پێنجێ ل هەڤلێرێ هاتیە سازكرن (Internitional recognition on genocide in kurdistan) پێخەمەت ب جیهانیكرنا جینوسایدا كوردستانێ . تایێ هەرمان داخاز ژ پەرلەمان و حكومەتا ئەلمانیا كر كو پشتگیریا پروسێ ب جیهانیكرنا جینوسایدا دژی گەلێ كوردستانێ بكەن و هیڤی كر ئەلمانیا رولەكێ مەزنتر ژ بو پرسا هەڤكاری و مافێ مروڤان ل كوردستانێ و روژهەلاتا ناڤەراست بگێریت . پاشتر دەمێ خانم گراف و هەڤكارێت وێ گوهداریا داخوازی و پێشنیار و شروڤە یا هەرمان كری، تایێ هەرمان دیراسەك ئەكادیمی و رێك و پێك و زەلال و بەرفرە لسەر پرسا جینوسایدا كوردستانێ و هەروەها چەند بەلگەنامە و دیكومێنت و سی دی و ڤیدیو و وێنە ل سەر قوربانیێت كومكوژی و ئەنفال و قڕكرنا هەلەبجەی رادەستی وان كر . خانم گراف گوت : ئەم زور د كەیفخوشین كو دەزگەهێ هەرمان و حكومەتا هەرێما كوردستانێ پرسا جینوسایدا كوردستانێ پێشكەشی پەرلەمانێ ئەلمانیا دكەن . بێگومان ئەڤ پرسە پرسەك دادپەروەرانەیە و هێژایە و ژ مە دهێت خواستن كو ئەم باشتر ل سەر ئاگادار بین و راستیا وێ ب هویری شروڤە بكەین و ب ئاوایەكێ یاسایی، حقوقی و فەرمی چارەسەر بكەین . من زور ئاگا لێبویە لێ ئەڤ پرسا تراژیدی گەلەك تشت و دیكومێنت و پێزانین و تێكوشینان دخازیت و ئەرك و بەرپرسیارەتیا مەیە . ئەزێ لسەر ڤێ پرسا خەمگین و بالكێش، كەمپینەكا بەرفرەهتر دگەل هەڤالێت خوە ل پەرلەمانێ ئەلمانیا چ ل پارتیا مە چ ژی دوستێت مە د پارتیێت دیتردا ئاڤا بكەم، هەروەتوڤ گوت ئەز دێ هەول دەم ل پەرلەمانێ ئەوروپا هەڤكاریێ ب تایێ هەرمان راِ بدەمە مەشاندن . ئەڤ پرسا كومكوژیا هەلەبجە و ئەنفالێ پرسەكە كو چ مروڤ و دەولەتەك نكاریت خو ژڤێ پرسێ جودا ببینیت و خو ژێ دویر بكەت . ل درێژیا ئاخڤتنا خودا خاتو گراف لدور كونفرانسا دووەم بو ب جیهانیكرنا جینوسایدا ل دژی كوردستانێ گوت : یا باش ئەوە كو كونفرانس ل پەرلەمانێ یەكێتیا ئەوروپا بهێتە لدارخستن و ئەزێ فراكسیونا پەرلەمانتارێت ئەلمانی و هەڤالێت خوە ل پەرلەمانێ ئەوروپی ل بروكسێل ئاگادار بكەم و هەروەتوڤ ب پەرلەمانتارێت كو پشتگیریا پرسێت كوردان و تێكوشینێ بو ئازادیا گەلێ كوردستانێ ل پەرلەمانێ ئەوروپادا دكەن تێكهەلییان چێ كەم . خاتو گراف لدور رەوشا كوردێت پارچێت دیترێت كوردستانێ و كاودانێ مافێ مروڤان ل وان جهان ژی دلگرانیا خو دەربڕی و دیاركر كە ئەو و پشكا وێ د پەرلەمانێ ئەلمانیادا ( پشكا مافێ مروڤان و هەڤكاریێت مروڤی ) بەردەوامی ب كارێ خو دڤێ مژارێدا ددەن .
ل دویماهیێ ژی ڤەخویندنا تایێ هەرمان ژ بو سەردانیا كوردستانێ پەژراند ژ بو كو سەردانا مالباتێت قوربانیێت جینوسایدێ و قڕكرنێ و ئەنفالێ ب تایبەتی ل هەلەبجە بكەت .
ڕاگەهاندنا ئنستیتیوتا تایێ هەرمان
ژ بو لێكولین و زانست و تێكهەلییان ل ئەلمانیا و ئەوروپا
 |
 |
 |
 |
